კლინიკა ენმედიცი
კლინიკა ენმედიცი პროფესიონალი კადრებით დაკომპლექტებული, უახლესი ტექნოლოგიებითა და მძლავრი მატერიალურ-ტექნიკური ბაზით აღჭურვილი მრავალპროფილური სამედიცინო დაწესებულებაა, რომელიც უზრუნველყოფს მაღალი ხარისხის და თანამედროვე სტანდარტების შესაბამის სტაციონარულ და ამბულატორიულ სამედიცინო მომსახურებას თბილისსა და ბათუმში.
კლინიკა ენმედიცში თითოეული პაციენტი უზრუნველყოფილია მაღალი ხარისხის სამედიცინო მომსახურებით, რომელიც დაფუძნებულია კლასიკური მედიცინის საუკეთესო ტრადიციებზე, მედპერსონალის მაღალ პროფესიონალიზმზე, მტკიცებულებებზე დაფუძნებული თანამედროვე მიდგომების გამოყენებაზე, დიაგნოსტიკისა და მკურნალობის უახლეს მეთოდებზე და ულტრათანამედროვე აპარატურაზე.
კლინიკა ენმედიცი საქართველოში კლინიკური ენდოკრინოლოგიის პიონერია, რომელიც დაარსდა თბილისის პირველი კლინიკური საავადმყოფოს ენდოკრინოლოგიის განყოფილების ბაზაზე და დაფუძნებულია ცნობილი მეცნიერისა და პედაგოგის, ვაჟა ივერიელის ინიციატივით. ჩვენი ისტორია იწყება XX საუკუნის 60-იანი წლებიდან, როცა საქართველოში პირველმა ენდოკრინოლოგიურმა განყოფილებამ ფუნქციონირება დაიწყო და მოგვიანებით იგი მთელ ამიერკავკასიაში პირველი დამოუკიდებელი ენდოკრინოლოგიური კლინიკა გახდა.
2024 წლიდან ჩვენს კლინიკას, თბილისში და ბათუმში, მიენიჭა ამერიკის საერთაშორისო სააკრედიტაციო კომისიის (AACI) საერთაშორისო აკრედიტაცია, რაც ჩვენი სამედიცინო მომსახურებისა და უსაფრთხოების საერთაშორისო სტანდარტებთან შესაბამისობას ადასტურებს.
მისია
უზრუნველყოს პაციენტზე ორიენტირებული მაღალი ხარისხის სამედიცინო მომსახურება, უსაფრთხო გარემოში და ეთიკის მაღალი სტანდარტების დაცვით, რათა ჩვენი ყოველი ნაბიჯი ემსახურებოდეს პაციენტის სიცოცხლის ხარისხის გაუმჯობესებას.
ხედვა
გავხდეთ საქართველოს (და არამარტო) წამყვანი და ყველაზე სანდო სამედიცინო დაწესებულება, რომელიც გამოირჩევა მომსახურებისა და უსაფრთხოების მაღალი სტანდარტით, პროფესიონალიზმით და ორიენტირებულია გრძელვადიან წარმატებაზე.
კლინიკა ენმედიცის ღირებულებები:
- პაციენტზე ორიენტირებულობა - ჩვენთვის პრიორიტეტულია პაციენტის ჯანმრთელობა და მისი ინტერესები. თითოეულ პაციენტს ვეპყრობით თანაგრძნობით, პატივისცემით და პასუხისმგებლობით, ვუქმნით კეთილგანწყობილ გარემოს, პატივს ვცემთ მის ღირსებას, აღმსარებლობას, ტრადიციებს და ვიცავთ კონფიდენციალურობას;
- პროფესიონალიზმი - ვცდილობთ ვიყოთ საუკეთესო ჩვენი ცოდნითა და გამოცდილებით, რასაც ვაღწევთ უწყვეტი განათლებით, განვითარებით, ინოვაციების დანერგვით.
- გუნდურობა - ვქმნით გუნდურ და მხარდამჭერ სამუშაო გარემოს. თანამშრომლები დახმარებას უწევენ და გამოცდილებას უზიარებენ ერთმანეთს, აქვთ ერთიანი ხედვა და მიზნები, რაც შეესაბამება კლინიკის ხედვას და მიზნებს.
ხარისხის პოლიტიკა
ჩვენი კლინიკის მიზანია მაღალი ხარისხის, ხელმისაწვდომი, უწყვეტი სამედიცინო მომსახურების და უსაფრთხო გარემოს უზრუნველყოფა, პაციენტის კმაყოფილების მაღალი დონის მიღწევა, შენარჩუნება და განვითარება, რაც ხარისხის პოლიტიკის განხორციელებით მიიღწევა.
ხარისხის პოლიტიკის მიზნების შესრულებისთვის კლინიკაში ჩამოყალიბებულია ხარისხის მართვის სისტემა, რომლის ფუნქციონირებაზე პასუხიმგებელია კლინიკის ხარისხის მართვის კომიტეტი.
ხარისხის მართვის სისტემის ძირითადი ინსტრუმენტებია პროცესების სტანდარტიზაცია, დაგეგმვა, შესრულება, შემოწმება (მონიტორინგი, კონტროლი), შედეგების/ინდიკატორების გაზომვა და ანალიზი, მოქმედება (რეკომენდაციების და/ან მაკორექტირებელი ღონისძიებების შემუშავება და განხორციელება), გადამოწმება. ამ ინსტრუმენტების გამოყენებით ხდება ზედამხედველობა კლინიკაში არსებულ პროცესებზე.
მათ შორის:
- სამედიცინო სერვისების (კლინიკური, დიაგნოსტიკური, ლაბორატორიული, პათანატომიური) ხარისხი;
- პაციენტის უსაფრთხოება (მათ შორის, მედიკამენტებისა და სისხლის/სისხლის კომპონენტების სწორი და რაციონალური გამოყენება, პოლიფარმაცია);
- სანიტარიულ-ჰიგიენური და ეპიდსაწინააღმდეგო რეჟიმის და ინფექციების კონტროლის ღონისძიებები;
- გარე პროცესების (კონტრაქტორების) ხარისხი;
- მოქმედი კანონმდებლობის, სტანდარტების და კლინიკის მიერ დამტკიცებული ინსტრუქციების იმპლემენტაცია;
- უტილიზაციის მართვის სისტემა;
- პაციენტების და თანამშრომლების პრეტენზიები/საჩივრები და კმაყოფილების დონე;
- რისკების მართვა (ფიზიკური გარემო, ინფრასტრუქტურა, ტექნიკური აღჭურვილობა, კრიტიკული პროცესები);
- თანამშრომლების განათლება.
კლინიკა მუდმივად ახდენს თვითშეფასებას და ხარისხის გაუმჯობესებას. ხარისხის მართვის სისტემის გამართული მუშაობა განაპირობებს კლინიკის სანდოობას, მაღალ ხარისხს და გრძელვადიან წარმატებას.